Potosíko meatzetan injustizia zein premia gorrian bizi eta lan egiten duten ehundaka familia ezagutu ondoren, neska-mutilak batez ere, esku bat luzatu nahi diogu bereziki atsegin dugun proiektu bati: Escuela Robertitori.

Eta zuen laguntza ekonomikoa eskatu nahi dugu horretarako, amaieran zehazten dugun gisara.

Escuela Robertito, Voces Libres erakundeak bultzatua, Potosíko Cerro Rico mendian dagoen eskola bakarra da. Bertan, 4.000 metrotik gorako lur soiletan, altiplanoko haizete eta hotzak astinduta, meatzari familia ugari elektrizitate zein ur korronterik gabeko adobezko etxoletan metatzen dira. Maiz agertzen dira gaixotasunak, metala darion mendiko ur kutsatuak eragindako intoxikazioak eta umeen desnutrizio kasuak. Sos batzuen truke, eztainua zarrastatuz munduko meatze hondatu eta arriskutsuenetakoan dihardute gazte hauek, erorketek, gasek eta silikosi kasuek mehatxatuta. Bizi itxaropena 40 urte inguruan dago.

Voces Libres erakundeak hainbat proiektu garatu ditu Potosíko meatzeetan: osasun sorospenak, ikasketa zein elikadura bekak gazteentzat, umezurtzentzako aterpea, interesik gabeko mikrokredituak emakumeek euren negozio txikiak aurrera eramateko, aholkularitza juridikoa….

Proiektu horietako bat Escuela Robertito da, Cerro Ricon dagoen eskola bakarra. 60 edo 70 neska-mutilez arduratzen da oinarrizko heziketa , elikadura eta higienea emanez, eta haurren meatzari lanen prebentzioan jardunez.  

Aurrekontu zehaztuan ikusiko duzuen bezala, laguntza behar dute eskolako oinarrizko behar hauek asetzeko:

Batetik, zentroan dauden 60 edo 70 gazteentzako eskolako materiala: oinarrizko materiala erosi beharra daukate (liburuak, koadernoak, boligrafoak, motxilak…), baita musika instrumentu zein marrazketa lanabesak ere, oso garrantzitsua baideritzote espresio eta terapia tailerrak garatzea ume hauekin, indarkeria eta babesgabetasun handiko egoerak jasaten baitituzte askok, baita arazo psikologikoak ere. Liburutegi batekin ere hornitu nahi dute zentroa.

Bestetik gazteen oinarrizko beharrei erantzuteko laguntza: eskolan jaten ematen diete, oinetakoak banatu eta oinarrizko higiene betebeharrak erakusten dizkiete...

2011rako aurrekontua ez daukate ziurtatua, horregatik osatzen lagunduko diegu. 60-70 gazteen ardura urte guztian euren gain hartzeko, 7.449 euro behar dituzte. Gutxi gora-behera, 10 euro gazte eta hilabete bakoitzeko. Erreferentzia baliagarria, esku bat luzatzea erabakitzen baduzue.

Kolaborazio ekonomiko honen helburua, laguntza mugatu bat baino gehiago, meatzeetan bizi diren gazteen formakuntza eta autonomia bultzatzea da, beraiek izan daitezen euren komunitateari lagunduko diotenak etorkizunean. Bekak eskuratzeko, asistentzia minimo bat bete behar dute eskolan, auzolanean astean behin edo bitan lagundu eta trebakuntza profesionala jaso (zurgintza, okintza, ehungintza…). Oinarrizko laguntza ematea da ideia, euren gaitasunak garatzeko, gero bizibide hobeagoak bilatzeko ahalmena izan dezaten, meatzetik kanpo.

1. Kontu korronte bat ireki dugu La Caixan:
   2100-5608-34-0200095623
   
   
2. Dirua eman daiteke on line Voces Libres erakundeari zuzenean.
   
   
3. Ander Izagirre eta Voces Libres erakundearen artean dagoen kolaborazio akordio honen bitartez, la Caixa-ko kontuan jasotzen diren diru sarrera guztiak Potosíko Voces Libres erakundera bidaltzera konprometitzen gara. Elkarteak urtean 2 txosten behintzat bidaliko ditu jasotako diruarekin aurrera eramaten dituzten ekimenak erakusteko.